WEBsessed
Razan Khatib's commentary on life on/off the web

Archive for October, 2011

فلسطين 3

انا لسّة ما عشت بأرضك دقيقة وحدة

شفتك إكتير من فوق وعلى جووجل إيرث، و من الضفة الشرقية، موطني

تخيلتك من قصص تيته

شُفتك بعيونها، وبعيون خالتو و عمّو

شُفتك بدموعهم، بغضبهم، بذكرياتهم

شُفتك وإنتي عم تتلاشي من عيونهم بالأفق، لما تركوكي

بيسان، طبرية و صفد

انا لما بقول أني أردنية، بقول اصلي فلسطينية

بعض الناس بتفهم، و بعضها لأ

أنتي قضيًّتي، من لما تعلّمت إسمي.

عطيتيني وجود مختلف .

انا و ملايين غيري بالبلاد و بالشتات

يمكن عشان هيك مابيفهمو هنّه

لأنو مفكرينو موضوع جنسية، موضوع وطني، موضوع سياسي، موضوع دول و استقلال و مجلس امن،

كانو إمارات و صارو دول الا انتي

محوكي او أجّلوكي

وهللأ بدهم يقنعونا، انو انتي جاي عالطريق بمشروع هالدولتين

طب وين بيسان، طبرية و صفد؟

تاريخ عائلتي وين راح؟ انا وين تاريخي؟

هي القصة شقفة ارض وبس؟ علم، رئيس، حكومة، جواز سفر، سفارة وأمم متحدة؟

يعني بصير أقول اصلي من فلسطين التاريخية؟ من امارة فلسطين؟ اللي إسمها إسرائيل؟ اللي هجّرت عائلتي؟

فلسطين، انت قصة وجود

فلسطين، انت ووجودي إشي واحد

هادا الوجود ما بتخلى عنّو ابداً

Wordpress Plugin